অহা ১৫জুলাইৰ পৰা টেলিগ্ৰাম সেৱা বন্ধ হব৷ আজি প্ৰকাশিত এই বাতৰিটো আপোনালোকৰ নিশ্চয় চকুত পৰিছে৷ম'বাইল,এচ এম এচ আৰু ইন্টাৰনেট, ই-মেইল আদিৰ প্ৰচলন হোৱাৰ আগতে চিঠিপত্ৰ আৰু টেলিগ্ৰামৰ অনেক গুৰুত্ব আছিল৷ ডাকত অহা ব্যক্তিগত চিঠি আজি মাথো এক নষ্টালজিক অভিজ্ঞতা৷ ডাক বিভাগত এতিয়া চৰকাৰী চিঠি পত্ৰৰহে বোধকৰো আদান প্ৰদান হয়৷ আজিৰ যুৱাচামৰ বহুতৰ হাতত হয়তো এখনো ডাকত অহা এনে ঘৰুৱা আপোন আপোন লগা চিঠি নপৰিবও পাৰে৷ এটা সময়ত 'ডাকোৱাল' হোষ্টেলৰ ছাত্ৰ-ছাত্ৰীসকলৰ মাজত এক প্ৰত্যাশা বা প্ৰতীক্ষাৰ প্ৰতীক স্বৰূপ আছিল৷একেদৰে টেলিগ্ৰামে সুসংবাদ বা দু:সংবাদো জৰুৰীভাবে প্ৰেৰকৰ পৰা প্ৰেৰিতলৈ কঢ়িয়াই আনিছিল৷ ঘৰৰ পৰা দূৰত চাকৰি কৰা সকলক এনে একোখন টেলিগ্ৰামে জৰুৰীভাবে ছুটী পোৱাত সহায়ো কৰিছিল৷ এনে বহু অভিজ্ঞতাৰ কথা গোটৰ ভালেকেইজনে জনাব পাৰিব৷ মোলৈ অহা দুখন টেলিগ্ৰামৰ কথা মই কেতিয়াও পাহৰিব নোৱাৰিম৷ সেই দুখন মোৰ ট্ৰাংকৰ চুকত এতিয়াও সযতনে থোৱা আছে৷ প্ৰথমখন হ'ল বেনাৰচৰ স্কুলৰ পৰা মোৰ প্ৰবেশিকা পৰীক্ষাৰ ফলাফল কঢ়িয়াই অনা সুসংবাদ আৰু আনখন মোৰ মেডিকেল পঢ়িবলৈ এডমিছন লবলৈ অসম চৰকাৰৰ স্বাস্থ্য সচিবৰ পৰা অহা নিৰ্দেশনাই অনা আন এক আনন্দ সংবাদ৷
টেলিগ্ৰামৰ যুগৰ অৱসান ঘটাৰ মুহূৰ্তত মোৰ অনুভৱ সহৃদয় পাঠকৰ সৈতে ভগাই ললোঁ৷
টেলিগ্ৰামৰ যুগৰ অৱসান ঘটাৰ মুহূৰ্তত মোৰ অনুভৱ সহৃদয় পাঠকৰ সৈতে ভগাই ললোঁ৷
১৩ জুন ২০১৩, ড'হা কাটাৰৰ পৰা ৷
No comments:
Post a Comment