বন্ধুবৰ মনোহৰ দত্ত
নলবাৰী, অসম
প্ৰিয় বন্ধু ~
আশাকৰো কুশলে আছে আৰু নিয়মীয়া কৰ্মব্যস্ততাৰ
মাজেৰে দিনবোৰ পাৰ কৰি আছে৷ লিখো নিলিখোকৈ নিজৰ কথাৰে দুআষাৰ লিখিবলৈ কি ব'ৰ্ডত হাত ফুৰাব আৰম্ভ কৰিলোঁ৷
মোৰো খবৰ শাৰীৰিক ভালেই ৷ ব্যস্তভাবে কামো কৰি সময় অতিবাহিত কৰিছোঁ৷ চাওঁতে চাওঁতে কাটাৰত মোৰ এবছৰ পূৰ্ণ হ'ল৷ আৰু তিনিবছৰ বাধ্যতামূলকভাবে থাকিবলৈ চুক্তিবদ্ধ হৈছোঁ৷ তাৰ পিছত নিজৰ ইচ্ছা ৷বিভিন্ন দেশৰ পৰা আহি এই দেশত কৰ্মৰত হোৱা মোৰ ৰোগীসকলৰ এখন জগতত মই জড়িত হৈ পৰিছোঁ ৷ তাৰ মাজতেই সুখ আৰু দুখানুভূতিৰ লুকাভাকু৷
এতিয়ালৈকে মই জনাত কমেও ৬টা অসমীয়া পৰিয়াল বৰ্তমান কাটাৰত আছে ৷ ইয়াৰ বাহিৰেও অবিবাহিত বা পৰিয়াল নথকা ব্যক্তিও কেইবাজনো (কমেও ৬৷৭ জন) কৰ্মৰত আছে৷ তাৰে দুজন ইঞ্জিনিয়াৰে ঘৰলৈ গৈ যোৱা তিনিমাহে ঘূৰি অহা নাই৷শুকুৰ আৰু শনিবাৰৰ বন্ধৰ দিনত ডুবাইত থাকি বাকী ৫দিন কাটাৰত কাম কৰা অসমীয়া ইঞ্জিনিয়াৰো আছে৷ মই এতিয়ালৈকে মাত্ৰ দুটা পৰিয়ালৰ সৈতেহে পৰিচিত হৈছোঁ৷ মোৰ 'কাটাৰৰ ডায়েৰী' অসমীয়া কথা বতৰা গোটত পঢ়ি যোৱা বছৰৰ নভেম্বৰ মাহতেই এটা পৰিয়াল মোলৈ মেইল পঠিয়ালে - মোক লগ ধৰিব বুলি ৷ কিন্তু দুয়োজনে চাকৰি কৰা হেতুকে হয়তো মোক লগ পাম বোলা কথাটো পাহৰিলেই৷ আচলতে পৰিয়াল কেইটাই নিজে ধৰা নিদিলে মোৰ লগ কৰাৰ উপায় নাই৷ অসমীয়া ডাক্তৰ একমাত্ৰ ময়েই আছিলোঁ যদিও দুমাহ হ'ল - চৌডি আৰবৰ পৰা আন এজন ডাক্তৰে যোৱা দুমাহ আগতে ড'হাৰ বেলেগ এখন চিকিৎসালয়ত যোগদান কৰিলেহি৷ অহাৰ পিছত তেওঁক এটা শুকুৰবাৰে মোৰ বাসস্থানলৈ আমন্ত্ৰিত কৰিলোঁ৷ কিন্তু তাৰ পিছত যোগাযোগ শূণ্য৷ তেওঁৰ পৰিবাৰে আবু ধাবিত চাকৰি কৰে আৰু পুতেক বোৱাৰীয়েকে ওমানত চাকৰি কৰে৷ এই তিনিখন দেশৰ লগত তেওঁ সম্পৰ্ক বৰ্তাই চলিবলগীয়া হৈছে৷
আমি সৰুতেই পঢ়িছিলোঁ
- মানুহ সামাজিক প্ৰাণী৷ অকলে থকাতকৈ সমাজ এখনত থাকি ভাল পায়৷ আকৌ পাইছিলোঁ -মানুহে কেবল ৰুটি খায়েই জীয়াই থাকিব নোৱাৰে৷ জীয়াই থাকিবলৈ মনকো কিছু খাদ্যৰ প্ৰয়োজন৷ সোণৰ পালেঙেত শুই ৰূপৰ কাঁহিত ভাত খাব পালেই মন তৃপ্ত নহবও পাৰে৷
ভাবৰ বুৰবুৰনিত মনলৈ যি আহিল তাকেই লিখি গলোঁ ৷ সুখ-দুখ মানুহৰ ব্যক্তিগত উপলব্দ্ধি ৷ ভাৱবোৰ কাৰোবাক জনালে মনতো পাতল নিশ্চয় হয়৷
আপোনাৰ মংগল কামনাৰে আজিলৈ ইমানতে সামৰিলোঁ ৷
ইতি
ডা০ ভূপেন শইকীয়া
ড'হা কাটাৰৰ পৰা, নিশা ৯ বজাত, ৯৷৭৷২০১২
No comments:
Post a Comment