মাতৃ দিবস উপলক্ষে এখনি চিঠি

প্ৰতি মনোহৰ দত্ত

নলবাৰী,অসম

বন্ধুবৰ~

     আপোনালৈ আৰু চিঠি গোটৰ সকলো পাঠকলৈ  প্ৰথমে  মোৰ  আন্তৰিক শুভেচ্ছা জনালো৷ আজি মাতৃ দিবস  দেশ-দেশান্তৰত পালিত হব৷

   সেই পবিত্ৰ মাতৃ দিবসত  মোৰ জননীক  স্মৰণ  কৰিবলৈ লৈ মোৰ  দুচকু পানীৰে ভৰি পৰিছে৷ আজিৰ পৰা সাত বছৰ আগতে মাতৃ দেবীয়ে আমাক এৰি নেদেখা জগতলৈ গুছি গৈছিল৷ পৰম  শ্ৰদ্ধাৰ  দেউতাৰো যোৱা মাহত প্ৰয়াণ  ঘটিল৷ আজি মাৰ  আবদাৰখিনিলৈ বৰকৈ মনত পৰিছে৷ প্ৰাপ্তবয়স্কৰ শিক্ষাৰ বাবে প্ৰচাৰিত  'জনশিক্ষা'ৰ  সাধু বানান কৰাই পঢ়াই অসমীয়া পঢ়িবলৈ -লিখিবলৈ মায়ে মোক শিকালে৷ তদুপৰি মা আছিল সাধুকথাৰ ভঁৰাল৷ কালুগাওঁৰ ঘৰৰ  জুহালত  বহি টোপনিয়াই টোপনিয়াই  সাধু শুনি শুনি মাৰ হাতেৰে খোৱা ভাত  আছিল অমৃত সমান৷

   মায়ে আমাক নামঘৰত নিয়মিয়াকৈ প্ৰাৰ্থণা গাবলৈ শিকাইছিল৷ এটা কথা মই ডাঙৰ হোৱাৰ পিছত বহুত  পলমকৈ গম পাইছিলো - মায়ে সদায় নামঘৰত চাকি জ্বলাই  লৈ পোন প্ৰথমে মোৰ ভালৰ কাৰণে ভগবানক প্ৰাৰ্থণা জনাইছিল৷ মা আছিল বহুমুখী প্ৰতিভাৰ গৰাকী৷ কেবল নামেৰেই নহয়, এগৰাকী প্ৰকৃত  শিক্ষয়ত্ৰীৰ  থাকিবলগীয়া থাকিবলগীয়া সকলো গুণৰ  অধিকাৰী আছিল মা৷ মায়ে তাতৰ শালত  ফুলাম গামোছা আৰু চাদৰ  বৈছিল৷ এম্ব্ৰডায়েৰী কৰিছিল৷ পথাৰত  ধান ৰোৱা-দোৱা কৰিছিল৷ ঢেকীৰে চিৰা- সান্দহ খুন্দিছিল৷ প্ৰত্যেক বিহুত নানা ধৰণৰ পিঠা-পনাৰ সম্ভাৰ  মায়ে গৃহস্থ আৰু আলহীৰ আগত মেলি দিছিল৷ নিজ  হাতেৰে  গৰুৰ  গাখীৰ খিৰাইছিল৷ কোঁৱৰপুৰৰ দিখৌৰ পাৰত শৈশৱ কটোৱা  মায়ে ভাল সাতুঁৰিব  পাৰিছিল আৰু এই সাতোঁৰ বিদ্যাই মাজু ভন্টি পুতলাৰ জীৱন ৰক্ষা কৰিছিল৷ তিনিবছৰীয়া পুতলাই ঘৰৰ পুখুৰীৰ  পাৰৰ পৰা কোনেও তলকিব নোৱৰাকৈ পুখুৰীৰ গভীৰ তল পাইছিলগৈ ৷ মায়ে উদ্ধাৰ কৰাৰ পিছত ওচৰ চুবুৰীয়াই পুতলাক "কি দেখিলি অ' আইজনী পানী তলত ? " - প্ৰশ্নৰ  উত্তৰত  তাই কোৱা "পানীৰ তলত ইলিচ মাছ দেখিলোঁ" - কথাষাৰিয়ে বহুত দিনলৈ গাঁৱত আমোদ যোগাই থাকিল৷

   ----   লিখিলে কথা ওলায়ে থাকিব ৷ আজিলৈ মাতৃদেবীৰ স্মৃতিত  একাঁজলি অশ্ৰুঅঞ্জলি যাচি সভক্তিৰে প্ৰণিপাত  জনাই  চিঠিখন ইমানতে  সামৰিলোঁ ৷

                          ইতি

ডা০ ভূপেন শইকীয়া

১৩৷৫৷২০১২

ড'হা, কাটাৰৰ পৰা