কাটাৰৰ ডায়েৰী – ২

২৪ নভেম্বৰ, বৃহস্পতিবাৰ,২০১১

কাটাৰত সাপ্তাহিক বন্ধৰ দিন হ’ল শুকুৰবাৰ ৷ সেইবাবে বৃহস্পতিবাৰ সন্ধিয়াৰ পৰাই দোকান-বজাৰত মানুহ আৰু গাড়ী-মটৰৰ সমাগম আৰম্ভ হয় সাধ্য অনুসৰি ’ৱিকেণ্ড’ পালন কৰিবলৈ ৷ ইয়াত মহিলাৰ বাবে কাপোৰৰ বাধ্যবাধকতা নাই ৷ বোৰকা পিন্ধা লোক বিৰক্তি লগাকৈ চকুত নপৰে ৷ তথাপিও অফিচত, বেংকত কাম কৰা কাটাৰী মহিলাসকলে কলা বোৰকা পৰিধান কৰে ৷ মহিলাৰ মূৰ আৰু মূখ ঢকা বস্ত্ৰক ’হিজাব’ বা ’খিমাৰ’ বোলে৷ কাটাৰী পুৰুষসকলে দীঘল ভৰি ঢুকি পোৱা বগা চোলা পৰিধান কৰে ৷ মূৰত সাধাৰণতে ৰঙা-বগা গামোছাৰ পাগ মাৰে, যাক ‘ঘুত্ৰা’ বোলে ৷ ঘুত্ৰাক কলা বা মুগা ফিটাৰে বান্ধি ৰাখে - যাক ’ওগাল’ বোলে ৷ বিদেশৰ পৰা অহা লোকসকলে মাৰ্জিত বস্ত্ৰ পিন্ধাটো বাঞ্ছনীয়৷ দেশখনৰ ধৰ্ম ইছলাম - জনসংখ্যা অনুসৰি শতকৰা ৮০ ভাগ ইছলাম, ৮ ভাগ হিন্দু,  ৮ ভাগ খৃষ্টান আৰু বাকী ৪ ভাগ হ’ল বৌদ্ধ বা আন  ধৰ্মৰ লোক৷ কাটাৰীসকলৰ মাতৃভাষা আৰবী ৷শিক্ষিত কাটাৰীসকলে ইংৰাজী জানে ৷ ইংৰাজীৰ বাহিৰে হিন্দী,উৰ্দু, পাৰ্চী সৰ্বসাধাৰণৰ মাজত যোগাযোগৰ ভাষা৷ কেইটিমান অতিকৈ ব্যবহৃত আৰবী শব্দ হ’ল - আইৱা (হয়), লা (নহয়), শ্ৰুকান (ধন্যবাদ), কেইফ হাল (কেনে আছে ?), হামদুল্লা (ভালেই), মা অ’চলাম (বিদায়), হবিবি (ভাল পোৱা, বন্ধু্ত্ব) ৷
আগতেই উল্লেখ কৰিছো কাটাৰত বুজন সংখক ফিলিপাইনী লোক আছে ৷ ইয়াত তেওঁলোকে সমাদৰ পোৱাৰ ঘাই কাৰণ হ’ল এইকেইটা - ফিলিপাইনীবিলাকৰ হ’ম চিকনেচ নাথাকে, সুলভ দা-দৰমহাত কাম কৰিবলৈ সাজু হয়, নাক চেপেটা হলেও প্ৰায়বিলাকৰে গাৰ বৰণ বগা ৷ ইয়াত থকা ইজিপ্তিচিয়ান সকলৰ সুবিধা হ’ল - আৰবী মাতৃভাষা ৷নিজৰ দেশত দীৰ্ঘদিনীয়া অশান্তিৰ বাবেও তেওঁলোকে কাটাৰতে থাকি ভাল পায় ৷কাটাৰত কিছু সংখক নেপালী লোক চিকিউৰিটি হিচাবে কাম কৰি আছে ৷ বাংলাদেশী বেচি ভাগেই হ’ল লেবাৰ,নতুবা ৰান্ধনি,  নাইবা ঘৰৰ বন-কৰা ৷
ইয়াত পেট্ৰল লিটাৰত মাত্ৰ দহ টকা ৷ মাছ-মাংসৰ তুলনাত শাক-পাচলিৰ দাম অধিক ৷ চুপাৰ মাৰ্কেটৰ দোকানত মাটিকান্দুৰি, মৰীছা,কলমৌ,লাই শাক, কলডিল,পচলা,কচু, লাউ-জিকা-ভোল আৰু অন্যান্য পাচলি কিনিবলৈ পোৱা যায় ৷ ইয়াৰ উৎপাদিত খেজুৰৰ মূল্য কিছু কম৷ খাদ্যাভাসৰ দোষতেই আৰব দেশসমুহত বেচি দিন থকা লোকসকলে কলেষ্টৰল বেচি হোৱা ৰোগত ভোগে ৷